martedì 1 agosto 2017

La poesia del martedì

Sēr d’istȇ

Dop ȥèna agli aspitéva
do scarȃn par mètaş isdé,
par discòrar ’d la giurnèda
o par fèş do risé.
U j e’ ch’ cunteva dal störi
int e’ silénȥi ad nȏ ȥnè,
ch’ a l scureva ’d vita e ’d mört,
e te ’d dmadivta tènt parché.
Störi ad fȃm int e’ desért
cun i bdócc ins la pël,
e la not un ’vstì ’d giàȥ,
sol cun la cvérta ’d al stël.
Fèt cunté nènca ridènd,
ma incöra int j ócc la paura,
e no a lè, a boca ’verta,
sènȥa ’vdé cl’ömbra scura.
Ȯ e’ sbaséva la tësta,
e pu ’d scat u l’alȥéva
purtè veja da ’na vos,
e da e’ fresch che sintéva.


U s rumpéva che trèb
cun l’asrès ad pio’ ’d ’n òcc,
piȃn la zènt l’a s aviéva
tra un salùt e un sbadàcc.
L’avanzéva a lè int l’ëria
l’eco ’d vȏs ch’ jera stȇ,
e’ fil ’d fóm ’d ‘na ȥigarèta
e i prufom d na not d'istè

Roberto Pontoni
Stampa questo articolo

Nessun commento:

Posta un commento